LEZZAYER TAMANEƔT – Iwekked-d, ass n usiḍyas deg Lezzayer Tamaneɣt, uneɣlaf n temguri tawesfart, Lotfi Benbahmed, dakken afares n tgezzayt mgal waḍḍan n Covid-19 ad d-tili s ticcurka d Rrus yernu d tagrawt n Saidal ara yesɛun tamsufɣa akken ad d-tfares tagezzayt-a n Sputnik V.

« D Asenduq Arusi n Usefti Usrid ay yettamden asɣenzi n tgezzayt tarusit n Sputnik V ay d-yesnegma Usudu n Unadi n Tsenbayyurt d Temẓasnudert (Gamaleya). Asenduq-a yesbuda-d, kraḍ n wayyuren aya, kra n tmura ay yesɛan iketturen akken ad d-farsen tagezzayt-a, gar-asent Lezzayer deg temnaḍt n Ugmuḍ Alemmas d Tefriqt n Ugafa », ɣef wakken ay d-yenna Mass Benbahmed deg yiwet n tesguri i Tnegga n Yisalan n Lezayer, am wakken ay d-yesmekti dakken asuter anmaḍal i tgezzayt mgal waḍḍan n Covid-19 simal irennu yernu d aya ay yeǧǧan timura tineɣrafin ad sgiǧǧent afares ɣer tmura niḍen akken ad zemrent ad qablent asuter anmaḍal.

« Nekkni, seg yidis-nneɣ, neqbel aya mraw n wussan aya », ɣef wakken ay d-ixebber uneɣlaf ay d-yernan dakken aɣtas-a « yettwaddem deffir ma yella-d umciweṛ gar uɣlif n temguri tawesfart d Tnegga Taɣelnawt n Yifarisen Iwesfaren d yimazzayen n Rrus ay d-yettgensisen Asenduq Arusi n Usefti Usrid d Usudu n Gamaleya ».

« Mi ifuk umciweṛ-a, tettunefk-d tɣerɣert tatwilant aydeg llan yisefka itwilanen yessefken i uɣraf n tgezzayt-nni », ɣef wakken ay d-yenna uneɣlaf-a.

I lmend n waya, « ticcurka ad d-tili gar Usenduq Arusi n Usefti Usrid d tegrawt tawesfart tanagdudt n Saidal ay yettwafernen akken ad as-tettunefk temsufɣa i ufares n tgezzayt-a, yernu ad d-yili waya ɣef leḥsab n wammaken itwilanen d yilsanen ay tesɛa », ɣef wakken ay d-yenna uneɣlaf ay d-yernan dakken Saidal tesɛa akettur n ufares n tgezzayt-a s tenga tamenzut ara d-yefk yidis arusi.

aps