LEZZAYER  TAMANEƔT – Agim d semmus (1005) n liḥalat timaynutin yettwatebten i yeṭṭef unfafad Bu Tesmert (Covid-19), 627 n wid ijin akked tmettant n 19 n yimuḍinen i yettwakelsen deg 24 n yisragen-a ineggura deg tmurt n Lezzayer, i d-yenna ass n uynas (letniyen) deg Lezzayer tamaneɣt umutlay n Tesqamut tussnant n uḍfar n umhaz n waṭan n unfafad Bu Tesmert Covid-19, Amsuji Djamel Fourar.

Aɣrud n liḥalat yettwatebten yewweḍ ar 75.867 ideg llant 1005 n liḥalat timaynutin, akka nessaweḍ ar 2,3 n liḥalat i 100.000 n yimezdaɣen deg 24 n yisragen-a ineggura, win n tmettanin ar 2.294 n liḥalat, ma d amḍan n yimuḍinen ijin yezger ar 49.421, i d-yesseddi Umsuji Fourar deg temlilit tayalast akked tɣamsa yerzan amhaz n waṭan n unfafad Bu Tesmert Covid-19.

Rnu-as, deg 14 n yigezda skelsen, deg 24 n yisragen-a ineggura, ddaw n 10 n liḥalat, deg 14 igezda-iḍen ur skelsen ula d yiwet n liḥala tamaynut, ma deg 20 n yigezda skelsen ugar n 10 n liḥalat.

Seg yidis-iḍen, 46 n yimuḍinen ha-ten-in ddaw n tmacinin n usnuffes, i yerna yenna-d.

Yezzireg-d umasay-nni dakken liḥala tasenbayyurant n yimir-a tḥettem-d ɣef uɣerman taɛessast akked uqader n yilugan n tezdeg akked usmecceq tafekkant, yesmekti-d daɣen aqader n ukman akked tmelsiwt n tgelmust.

aps