LEZZAYER TAMANEƔT – Yenna-d uneɣlaf n tdawsa, Abderrahmane Benbouzid, ass n ukwas, dakken Lezzayer ad d-tawi tagezzayt mgal waḍḍan n Covid-19 ara izerken akk tiwtilin iwatan i waya, akken yebɣu yili watig-nnes.

Deg yiwet n tesguri n tɣemsa, deg yijifeṛ n yiwen n umyager i usfugel n Wass Agraɣlan n Umennuɣ mgal Uzbu mgal Yimeglemẓudren (13 Wamber), Mass Benbouzid yenna-d dakken Lezzayer « ur d-tettaǧew ara kra n tgezzayt ma yella tamurt aydeg d-yettwafares ur teḍmin ara dakken ur tettḍurru ara yernu d tamellilt yernu yella-d waya s uzrak n lewṣayat n uselway n tegduda, Abdelmadjid Tebboune ».

Aneɣlaf yerna-d daɣ dakken yemmuger inmahalen d yimasayen n tmura tinfarasin n tgezzayt mgal unfafad bu uqacuc akken ad zerwen amek ara d-tettwaǧew tgezzayt-a ay yessefken ad tezrek lewṣayat n Tseqqimt Tussnant n Uḍfar n Umhaz n Tkaɣreft n Unfafad bu Uqacuc « akken yebɣu yili watig-nnes », yernu yella-d waya i lmend n umesten n tdawsa n yiɣermanen.

Seg yidis-nnes, yenna-d uneɣlaf anesmigal d-yelhan s tsemmeskelt n yisegnafen, Ismail Mesbah, dakken taseqqimt tussnant theyya-d tasnuddest taɣelnawt i useqdec n tgezzayt-a asmi ara d-tettwaǧew d taggayin n tmetti umi yessefk ad tt-gen.

Deg wayen yerzan timerniwt n tejṛa d-yettwaklasen, yenna-d uneɣlaf dakken ssebba n waya d « tuqqla tanmettit d tɣurbizt yernu maci d lexṣaṣ n uzrak n wakaten n uḥezzeb ɣer kra n taggayin n tmetti, » am wakken ay d-yerna dakken tagnit-a tḥuza akk amaḍal.

aps