LEZZAYER TAMANEƔT – Yenna-d uneɣlaf n tdawsa, Apṛufisur Abderrahmane Benbouzid, ass n usamas deg Lezzayer Tamaneɣt, dakken ad d-yeqqel usekmen deg kra n twilayin ɣef lǧal n tmerniwt n tejṛa n unfafad bu uqacuc deg-sent, d acu kan, yenna-d dakken ur d-tettili ara « tayyugt tis snat » n ubayyur-a imi tagnit attan « meqbulet ».

« Ur d-netteg ara asekmen amaynu. S 200 n tejṛa deg wass, mazal-aɣ deg tegnit meqbulen ɣef leḥsab n yimsenbayyuren. Ur nelli ara deg tegnit aydeg d igiman n tejṛa ay d-yettwaklasen », ɣef wakken ay d-yenna uneɣlaf deg Ṛṛadyu Tis Kraḍt.

Ma yella tagnit ur tettaweḍ ara ɣer uswir n « timmihewt », ur d-yettili wacemma, d acu kan, mer ad d-iban yidik ayseg yezmer ad izreɛ waḍḍan, iban dakken yessefk ad yettwassejhed usekmen deg temnaḍin ay iḥuza waḍḍan ugar, ɣef wakken ay d-yerna.

Apṛufisur Benbouzid yenna-d dakken timerniwt deg umḍan n tejṛa ussan-a yezrin ur yebɣi ara ad d-yini dakken d tayyugt tis snat ay d-yebdan. « Mazal lḥal akken ad d-nwekked aya. Amhaz n waḍḍan atan yettali, yettader yernu akka ay yella umhaz n yibayyuren », ɣef wakken ay d-yenna.

Yenna-d daɣ uneɣlaf dakken yedwet s unqas ay d-yellan s umata tagara-a, d acu kan, iḥettet-d daɣ dakken yessefk ad yettwaḥrez uksab-a imi Lezzayer d yiwet seg tmura ay yessawḍen ad teqqim deg tegnit yelhan, yernu yenced-d medden akken ad ḥadren yernu ad qadren akaten n usebded n uzraɛ n waḍḍan, ladɣa s tmelsiwt n tgelmust.