LEZZAYER TAMANEƔT – Ttwawekkdent-d tamiḍi d smumraw kraḍt n tejṛa timaynutin n unfafad bu uqacuc, 104 n tujjyiwin d 3 n tmettanin deg 24 n yisragen ineggura deg Lezzayer, ɣef wakken ay d-yenna, ass n usamas deg Lezzayer Tamaneɣt, umutlay n Tseqqimt Tussnant n Uḍfar n Umhaz n Tkaɣreft n Unfafad bu Uqacuc, Aduktur Djamel Fourar.

Aɣrud n tejṛa d-yettwawekkden yewweḍ ɣer 51.067, gar-asent 153 n tejṛa timaynutin neɣ 0,3 n tejṛa i yal 100.000 n yimezdaɣen deg 24 n yisragen ineggura. Aɣrud n wid yemmuten yewweḍ ɣer 1714, ma d amḍan n yimuḍinen yejjin yewweḍ ɣer 35.860, ɣef wakken ay d-yenna Uduktur Fourar deg umyager ayalas n tɣemsa ay d-yettilin ɣef tkaɣreft n unfafad bu uqacuc n Covid-19.

Seg tama niḍen, 13 n twilayin ay d-iwekkden ddaw 9 n tejṛa deg 24 n yisragen ineggura, 29 niḍen ur d-wekkdent ula d yiwet n tejṛut, ma d 6 n twilayin wekkdent-d 10 n tejṛa.

Seg yidis niḍen, 22 n yimuḍinen ay yellan deg usesfer aneẓẓaw, ɣef wakken ay d-ixebber.

Iwekked-d daɣ umasay-a dakken tagnit tasenbayyurant n tmurt d tin ay d-iḥettmen ɣef yal aɣerman ad iḥader iman-nnes yernu ad yezrek ilugan n wuɣus d umgugu afekkan, am wakken ay d-yerna dakken yessefk ad zerken medden akaten n usekmen yernu ad tteqqnen tigelmusin.