LEZZAYER TAMANEƔT – Ttwawekkdent-d snat n tmaḍ tẓamraw kraḍt (293) n tejṛa n unfafad bu uqacuc, 264 n tujjyiwin d 7 n tmettanin deg 24 n yisragen deg Lezzayer, ɣef wakken ay d-yenna ass n usamas deg Lezzayer Tamaneɣt, umutlay n Tseqqimt Tussnant n Uḍfar n Umhaz n Tkaɣreft n Unfafad bu Uqacuc, Aduktur Djamel Fourar.

Aɣrud n tejṛa d-yettwawekden yewweḍ ɣer 46.364, gar-asent 293 n tejṛa timaynutin neɣ 0,7 i yal 100.000 n yimezdaɣen deg 24 n yisragen ineggura. Aɣrud n tmettanin yewweḍ ɣer 1556, ma d aɣrud n yimuḍinen yejjin yewweḍ ɣer 32.745, ɣef wakken ay d-yenna Uduktur Fourar deg umyager ayalas d tɣemsa i uḍfar n umhaz n tkaɣreft n unfafad bu uqacuc Covid-19.

Seg yidis niḍen, 15 n twilayin ay d-iwekkden gar 1 d 9 n tejṛa deg 24 n yisragen ineggura. 11 n twilayin niḍen kelsent-d ugar n 10 n tejṛa. Ma 22 n twilayin ur d-wekkdent ula d yiwet n tejṛut.

Seg tama niḍen, 44 n yimuḍinen ay yellan, imir-a, deg usesfer aneẓẓaw, ɣef wakken ay d-ixebber.

Iwekked-d umasay-a dakken tagnit tasenbayyurant aydeg tella tmurt tessutur-d seg yal aɣerman ad iḥader, ad yezrek ilugan n wuɣus d umgugu afekkan, am wakken ay yessefk ad yezrek asekmen yernu ad yeqqen tagelmust.

Iger-d daɣ tiɣri i uḥraz n tmeddurt n yimɣaren, ladɣa wid yesɛan aḍḍanen yezgan.