LEZZAYER TAMANEƔT – Tasmilt taɣlifant n teftawt tessuffeɣ-d taftawt aydeg d-tenna dakken imuḍinen yeččan ussan n Remḍan ladɣa ɣef lǧal n unfafad bu uqacuc, zemren ad rren ussan ay ččan deffir ma jjin.

Deg yiwen n ulɣu ay d-yettwaznen ass n usimwas i Tnegga n Yisalan n Lezzayer, tenna-d tesmilt dakken wid ur yezmiren ara ad ɣermen ussan ay ččan (am yimɣaren d yimuḍinen yesɛan aḍḍanen yezgan) zemren ad sseččen igellilen akken ad ɣermen ussan aydeg ttwalasen, akekn ay d-yenna Yuc deg Leqran: « Ma d wid ur as-yezmiren (yusa-asen-d yewɛeṛ aṭas), ad t-ɣermen s usečči n yigellil ».

Ma deg wayen yerzan uẓum n 6 n wussan n wayyur n Cewwal (ṣṣabrin), tenna-d tesmilt-a dakken uẓum-nsen d ayen yesɛan azal imi ay d-yenna umazun, taẓallit d talwit n Yuc fell-as, dakken « win ara iẓumen Remḍan, sakkin ad as-yernu sḍis seg wussan n Cewwal am win ay yuẓamen aseggas s lekmal-nnes ».

Tesmekti-d tesmilt dakken d ayen igerrzen mliḥ ma yella iẓum umdan ussan-nni, d acu kan, maci d ayen yettwaḥettmen.

Ussan-a yezmer umdan ad ten-iẓum wa deffir wayeḍ neɣ bḍan, am wakken ay yezmer ad ten-yuẓam deg wussan aydeg ara yawi ugar n lajeṛ, ussan n uynas d ukwas, d « wussan imellalen » n wayyur ayyuran (13, 14 d 15), ɣef wakken ay d-yenna uɣbalu-a.

aps