LEZZAYER TAMANEƔT – Yenna-d Uduktur Abderrahmane Ghlaimi, aselway n Tesmilt Tasnajyant n Tfidiṛalit Tazzayrit n Waddal n Yimeɛdaṛ dakken yessefk ad d-yili usefqed asnajyan n yinaddalen n tedɣert (ama d udwisen, ama d imeɛdaṛ) uqbel ma qqlen-d ɣer unrar.

« Asleɣmu deg uxxam ur d-yettkafi ara, dɣa ɣef waya ay yessefk ad qqlen yinaddalen ɣer usleɣmu deg unrar, d acu kan, yessefk ad ttqaqadren kra n yilugan idawsanen deffir ugar n sin n wayyuren n usekmen », ɣef wakken ay d-yessegza Ghlaimi ay yettwakellfen s uḍfar asnajyan n ulɣuɣ ulampi Taoufik Makhloufi.

Inaddalen n tedɣert ay yuɣren ɣer Wuraren Ulampiyen d Wuraren Ulampiyen n Yimeɛdaṛ n Tokyo n 2020 sbedden asleɣmu-nsen ɣef lǧal n tkaɣreft n unfafad bu uqacuc d uwexxer n Wuraren Ulampiyen ɣer useggas ay d-yetteddun.

Kra n yinaddalen sqenɛen kan s usleɣmu i uḥraz n tfekka-nsen. Ɣef waya, yenna-d Uduktur Ghlaimi, yemmuzzgen deg tesnult, dakken asefqed asnajyan yessekf ad yili d anagrawan i wakk inaddalen n tedɣert uqbel ma qqlen ɣer usleɣmu deg tzeqqa.

« Aneggaf addalan n uktazel n yinaddalen n tedɣert d wid n uswir unnig d win ay d-icerḍen fell-aɣ, uqbel ma tella-d tuqqla ɣer urmud, ad neg asekyed afekkan i unaddal », ɣef wakken ay d-iwekked Ghlaimi ay d-yernan dakken tamhelt-a tezmir ad d-tili deg yisegnafen neɣ deg wammasen isnajyanen addalanen yesɛan asgalef d teẓdarin yessefken i waya.

aps