LEZZAYER  TAMANEƔT – 120 n yimdanen imaynuten i yeṭṭef unfafad Buqacuc (Covid 19) akked tmettant n 8 n yimuḍinen i yettwakelsen deg 24 n yisragen a ineggura deg Lezzayer, akka yewweḍ umḍan n wid yuḍnen ɣer 3121 ma d win n tmettanin ɣer 415, i d tyenna ass n Ljemɛa umutlay n Tesqamut n uḍfar akked umhaz n waṭan n unfafad, Djamel Fourar.

Yemmeslay d deg usarag ayalas yerzan amhaz n waṭan, yesseddi d Umsuji Fourar dakken amḍan n yimdanen yejjin yewweḍ ɣer 1408, ideg llan 53 deg 24 n yisragen a ineggura.

Yerna yenna d daɣen amḍan n yimuḍinen i la nessejay yewweḍ ɣer 5433, ideg llant 1952 n liḥalat yettwatebten s uslaḍ n tnarmin akked 3481 n liḥalat yellan deg « ccek » ɛeddant degṛṛadyu akked uskanir, yesseddi d dakken 36 n yimuḍinen mazal iten deg usejji s tmacinin.

aps