LEZZAYER TAMANEƔT – Tesguri-d temsisit taredsant, yellan ddaw udabu n Tgelda Tasaɛudit, asebded ayendis n yimenɣi seg wass n ukwas deg Yaman i lmend n uḥezzeb i uzraɛ n unfafad bu uqacuc ay izemren ad yefk axeṣṣar d ameqran i tmurt-a tigellilt.

Ɣef leḥsab n temsisit-a ay yegren iman-nnes deg Yaman akken ad tedhel iɣallen iwnabaḍen n tmurt-a, asebded-a n yimenɣi n sin n yimalasen iswi-nnes d amennuɣ mgal uzraɛ n tkaɣreft n unfafad bu uqacuc ay iḥuzan amaḍal, maca werɛad ur yezriɛ ara deg Yaman.

Ula ma Iɣlanen Yeddukklen gren-d tiɣri, deg Meɣres yezrin, i umesten n yiɣarimen n tmurt-a seg tkaɣreft n unfafad bu uqacuc, terna tekriḍt, ussan-a, deg tmurt-a.

« Nesguri-d asebded n yimenɣi seg wass n ukwas i tallit n sin n yimalasen. Nettṛaju seg yiferdisen umrigen iḥutiyen ad t-qeblen. Aql-aɣ nessewjad-d anrar i umennuɣ mgal waḍḍan n unfafad bu uqacuc », ɣef wakken ay d-yenna yiwen n umasay asaɛudi.

Tamsisit tɛewwel ad tqader sin-a n yimalasen n usebded n yimenɣi, d acu kan, tejmeɛ daɣ azref akken ad d-terr ɣef yiman-nnes ma yella tettwanṭeg, ɣef wakken ay d-yenna umasay-a asaɛudi. Yezmer ad yettwasseɣzef usebded-a n yimenɣi ma « qeblen » Yiḥutiyen, ɣef wakken ay d-yerna, am wakken ay yessarem ad d-tili temlilit d Yiḥutiyen ddaw leɛnaya n Yiɣlanen Yeddukklen i usiweḍ ɣer usebded yimenɣi d imezgi.

Tagelda Tasaɛudit tessaram ad yessiweḍ usebded-a n yimenɣi ɣer tgara n umyenkaf-a yeṭṭfen semmus n yiseggasen, d win aydeg iɣallen iwnabaḍen n Yaman ttnaɣen mgal yiɣewwaɣen iḥutiyen yesɛan amussu n Ansarullah.

Taswiɛt-a, werɛad ur d-fkin ara Yiḥutiyen tiririt ɣef tesguri-a tasaɛudit. Ɣef leḥsab n yimanayen, lemmer ad yettwaqader usebded-a n yimenɣi, ad yili waya d tikkelt tamezwarut aydeg ara sbedden sin-a n yidisan imenɣi gar-asen seg wasmi ay t-sbedden, deg tgara n 2018, deffir yistagen ddaw leɛnaya n Yiɣlanen Yeddukklen ɣef temdint tasagnant tasnuddsant n Hodeida.

aps