LEZZAYER TAMANEƔT – Anfafad bu uqacuc amaynu mazal yettkemmil izerreɛ yernu yessexlaɛ deg umaḍal deffir ma yewweḍ umḍan n yimuḍinen-nnes ɣer 1,3 d amelyun n yimdanen, am wakken ay yegla s 75.000 n tmeddurin, deg wakud aydeg azgen seg yimezdaɣen n umaḍal ay ikemnen deg yixxamen-nsen i lmend n usebded n uzraɛ n tkaɣreft n unfafad-a.

Anfafad-a iban-d deg Dujembeṛ yezrin deg Ccinwa yernu, seg yimir-nni ɣer wass n usinas, yessaweḍ ad yeglu s 75.542 n tmeddurin deg umaḍal, kraḍ n yimuren ɣef kuẓ (3/4) seg-sen ddren deg Tuṛuft, ɣef leḥsab n yiɣbula unṣiben.

Ugar n 1.351.000 n tejṛa ay d-yettwawekkden deg 191 n tmura d yigelluyen seg wasmi ay d-iban ubayyur-a.

Tuṛuft d nettat ay d amenẓaw ay yenḍerren aṭas akk seg tkaɣreft-a, maca yebda yetteqqal-itt-id usirem deg tgara n yimalas yezrin mi yebda ineqqes umḍan n yimettinen deg snat n tmura ay iḥuza mliḥ waḍḍan-a, yernu ti d Spenyul d Ṭṭalyan.

Ṭṭalyan mmuten deg-s 16.523 n yimdanen seg waḍḍan-a, ma deg Spenyul, mmuten 13.798 n yimuḍinen, deg wakud aydeg Fṛansa tesṛuḥ 8.911 n yimdanen ɣef lǧal n unfafad bu uqacuc.

Aḍḍan-a mazal-it yettakf axeṣṣar daɣ deg Tgelda Yeddukklen anda 5.373 n yimdanen ay yemmuten, deg wakud aydeg uḍnen 51.608.

Aya yessexleɛ Ibriṭaniyen ladɣa imi ula d aneɣlaf-nsen amenzu, Boris Johnson, yelfa-d dakken yuḍen aḍḍan-a akken ay d-yettwakcef deg 27 Meɣres yezrin, yernu yers deg tzeqqa n usesfer aneẓẓaw ass n uynas. Ula ma fkan-as uksijin, maca ur t-rrin ara ɣer yimsunfes, ɣef wakken ay d-yenna yiwen n uneɣlaf.

Ma d Iwanaken Yeddukklen qqlen d nitni ay d tamurt ay yenḍerren aṭas akk seg unfafad bu uqacuc imi ay sɛan 368.449 n yimuḍinen, mmuten gar-asen 10.993 n yimdanen.

Ma d timura niḍen n umaḍal mazal, ula d nitenti, irennu umḍan n yimuḍinen d yimettinen deg-sent: Deg Ugmuḍ Alemmas, 4.083 n yimdanen ay yemmuten yernu ttwakelsen-d 81.952 n yimuḍinen ; deg Temrikt Talatinit d Tegzirin n Kaṛayib, 1.353 n yimdanen ay yemmuten, deg wakud aydeg d-ttwakelsen 35.842 n yimuḍinen ; deg Tefriqt mmuten 493 n yimuḍinen yernu uḍnen 10.005 n yimdanen; ma deg Tukyanust, mmuten 45 n yimdanen, am wakken ay d-ttwawekkdent 6.962 n tejṛa, ɣef leḥsab n yizwilen unṣiben.

Deg wakud aydeg 4 n yimelyaṛen n yimdanen (neɣ azgen seg yimezdaɣen n umaḍal) ay yettwaḥettmen neɣ gren-asen-d tiɣri akken ad qadren asekmen, Tuddsa Tanmaḍalt n Tdawsa tger-d tiɣri i temnaḍin ay terza temsalt akken ur ttḥirint ara ad kksent akaten n uḥezzeb uqbel wakud akken ur yettales ara ad yezreɛ unfafad-a deg temnaḍin aydeg yenqes

aps.