LEZZAYER  TAMANEƔT – Iɣella n yigezda yumer-iten, uneɣlaf Amezwaru, Abdelaziz Djerad, i wakken ad sersen, ma ɛeṭṭlen d ass 31 meɣres ideg nella, yiwen n unagraw « yerzan » anagraw n tallalt akked urafeq n yiɣermanen i wakken ad nessenɣes taɛkemt tadamsant akked tenmettit n yikaten n ukman deg uxxam i gan i wakken ad teḥbes tikli n unfafad Coronavirus deg Lezzayer.

Deg yiwen n uḍris n uweṣṣi, i tesɛa Tnegga n Yisalan n Lezzayer, ideg iɣella n yigezda ttwaweṣṣan i wakken ad sersen yiwen n unagraw yerzan tallalt akked urafeq ara iḍefren yiwen n uzenziɣ aɣelnaw n usegrer akked uttekki n tɣerfa, i wakken « ad sifessen taẓeyt » n yikaten n ukman.

« Deg ukatar n ḥareb akked umennuɣ mgal n unfafad « COVID-19 », rsen yikaten n ukman akked usenɣes n tikli i yimdanen i wakken ad nessenɣes timijwin n unṭaḍ n waṭan akked tiddin n unfafad. Ikaten-a glan-d s wuguren idamsanen akked yinmettiyen ɣef yiɣermanen s umata dɣa tiwaculin.

I wakken ad nessifses liḥala, aneɣlaf Amezwaru yeɣtes ad isers yiwen n unagraw n tallalt akked urafeq ara yeddun ddaw n yiwen n uzenziɣ ɣelnaw n usegrer akked uttekki n tɣerfa », i d-yesseddi uɣbalu-nni.

Almend n waya, ddaw leɛnaya n uneɣlaf n Ugensu, n tenbazin tidiganin akked Uṣeggem n wakal, numer iɣella n yigezda, « ddaw n uzwel n uɣiwel, i wakken ad nectel yiwet n tigawt yerzan asuddes akked usegrer n yigmamen, tudrin akked tegrawin n tnezduɣin », i d-yenna.

« Yerza waya Iselwayen n Yigrawen Iɣerfanan n tɣiwanin ddaw leɛnaya n yiɣella n yisunen akked yiɣella inesmigal, tuɣdaḍin-a ad sgerwent, ddaw talɣa n tesquma tidiganin, akked wufrinen n tɣiwant, tiddukliwin n yigmamen akked tudrin, iheggaren akked tiddukliwin n yigezda akked tid n tɣiwanin iremden deg teɣula n tallalt, rnu-d ula tinariyin tidiganin n Tazzirt Tazeggaɣt Tazzayrit akked Yiskutiyen Inselmen ».

S tseddi, ad yili « i yal agmam, taddart neɣ tagrawt n tnezduɣin, ad sersen amasay i tesqamut ara d-fernen seg gar yimasayen n tiddukliwin tidiganin i ttqadaren medden, iswi d tarusi n yiwen n usegrer aɣerfan ara yilin iɣermanen s timmad-nsen neɣ igensasen-nsen ».

aps