LEZZAYER TAMANEƔT – Anfafad bu uqacuc amaynu d win ay izerɛen s tɣawla yernu yettgensis-d amihi ɣef talsa, dɣa d aya ay d-yellan d ssebba i unebges d ujhid n umaḍal akken ad d-yelhu yid-s, yernu d aya daɣ ay yeǧǧan Iwanaken Yeddukklen, am mennaw n tmura niḍen, akken ad d-tini dakken amennuɣ mgal waḍḍan-a d « amgaru » mgal « ucengu ur d-yettbanen ».

Iwanaken Yeddukklen ɛeddan ɣer takkayt tamaynut deg umennuɣ-nsen mgal unfafad bu uqacuc, yernu iqeddem-d uselway Trump iman-nnes d aselway n « tallit n umgaru » deg wakud aydeg tamurt ijehden akk deg umaḍal tesɛa 7.300 n tejṛa d-yettwawekkden d 115 n yimettinen.

Deg Lubnan, amaru amatu n umussu n Ḥizbellah, Hassan Nasrallah, iga-d inaw ɣef unfafad bu uqacuc amaynu yernu yenna-d dakken yeqqel d aɣbel amezwaru n wakk talsa, am wakken ay iquren tamiwta mgal unfafad bu uqacuc ɣer « umgaru anmaḍal » aydeg yal amdan yessefk ad yeddem tamasit-nnes.

Seg yidis niḍen, tenna-d yiwet n tgejdit n uɣmis afṛansi n « Le Monde » dakken Fṛansa attan « deg umgaru », am wakken ay d-yules uselway afṛansi Emanuel Macron deg yinaw-nnes ay d-iɛedda deg tliẓri ass n 16 Meɣres.

Abayyur n unfafad bu uqacuc yenɣa 450 n yimuḍinen deg Fṛansa, gar-asen 78 n yimettinen mmuten deg 24 n yisragen, am wakken ay ttwasgenfen 5.226 n yimuḍinen, gar-asen 1.300 deg usduy, ɣef wakken ay d-yenna, ass n usimwas, uɣlif n tdawsa.

Deg Brizil, ugar n 13 n yimelyunen n yimdanen izedɣen deg « tfavelatin » ay yuggaden ad aḍnen anfafad bu uqacuc. Igmamen-a iɣerfanen yebnan ɣef tɣalltin d wid yesɛan tizenqatin d tuḥṛisin, ixxamen d imecṭuḥen yembabben wa ɣef wa, yernu aṭas seg-sen ur sɛin ara aman, dɣa s waya, zemren ad qqlen d agdef i waḍḍan-a, ɣef wakken ay d-nnan yimidyaten idiganen.

la source:aps