LEZZAYER TAMANEƔT – Simal trennu tecrawt n unfafad bu uqacuc (Covid-19) deg umaḍal yernu yekka umḍan n wid yemmuten i 6.000. Tacrawt tettimɣur ladɣa deg Tuṛuft, deg wakud aydeg inabaḍen n umaḍal ssuggten akaten akken ad ḥebsen azraɛ n tkaɣreft-a yernu ad d-ssukksen tidamsiwin-nsen seg ulukkez.

Ɣef leḥsab n Tuddsa Tanmaḍalt n Tdawsa, ugar n 168.250 n tejṛa n unfafad bu uqacuc ay d-yettwakelsen yernu mmuten 6.501 n yimdanen deg 142 n tmura. Ṭṭalyan, yellan d tamurt yenḍerren akk deg Tuṛuft, mmuten deg-s 368 n yimdanen seg waḍḍan-a deg 24 n yisragen ineggura yernu wa d aklis amaynu n waḍḍan-a deg tmurt-a. S uɣrud, mmuten 1.809 n yimdanen deg Ṭṭalyan seg gar 24.747 n yimuḍinen.

S waya, Ṭṭalyan d nettat ay d tamurt tis snat yesɛan aṭas akk n tejṛa n unfafad bu uqacuc, deffir Ccinwa, tamurt anda ay d-iban unfafad-a deg Dujembeṛ yezrin yernu d tin aydeg mmuten 3.213 n yimdanen yernu uḍnen 80.860 niḍen.

Iṛan mmuten deg-s 724 n yimdanen seg gar 13.938 n tejṛa. Spenyul mmuten deg-s 183 n yimdanen seg gar 5.753 n yimuḍinen. Ma d Fṛansa, mmuten deg-s 127 n yimdanen seg gar 5.423 n tejṛa. Ar imir-a, werɛad ur d-yennulfa kra n usafar i waḍḍan n unfafad bu uqacuc n Covid-19.

Spenyul tesseɣret-d aɛzal qrib d ummid yernu tesguri-d addad n teɣḍeft i tallit n 15 n wussan. Fṛansa attan deg uswir wis 3 n ubayyur-a, d win aydeg anfafad-a yezreɛ deg wakk timnaḍin n ugelluy-nnes, yernu s waya, yeɣtes unabaḍ afṛansi ad yemdel tineččiyin, ibaṛen, tinedrazin, isalayen d tegsura. Iɣerbazen, tisdawiyin d tnefra ad ttwamedlen ttwamedlen seg wass n uynas.

Seg yidis adamsan, tibankiwin tilemmasin n tdamsiwin tigejdanin n umaḍal (Iwanaken Yeddukklen, Tadukli Tuṛufit, tibankiwin tilemmasin n Jjapun, Tagelda Yedduklen, Kanada d Sswis) bdant-d, ass n usamas, tigawt ayɣef d-yella umciweṛ i lmend n usigeẓ n wulzuzen idrimanen s yidrimen.

Taḥarazt Tafidiṛalit n Yiwanaken Yeddukklen tessenqes iktamuren-nnes s 1 n tenqiḍt akken ad tekkes aɣbel i wulzuzen. Ma d Tadukli Tuṛufit tessefray ad d-yili ulukkez deg 2020, ɣef wakken ay d-yenna, ass n uynas, uwesmir uṛufi d-yelhan s wulzuz agensi, Thierry Breton, deg terga n BFM Business, d acu kan, ur d-yefki ara izwal ɣef ulukkez-a, am wakken ay d-yerna dakken anfafad bu uqacuc ad yesɛu tazrirt d tamakkit ɣef unerni uṛufi, d win ara d-yilin gar 2 d 2,5%.

la source:aps