LEZZAYER TAMANEƔT – Tacrawt ay d-yeffɣen ass n usamas d tin ay d-ikecfen dakken ugar n 6.000 n yimdanen ay yemmuten seg tkaɣreft n unfafad bu uqacuc yernu timerniwt-a tameqrant tella-d imi ay yerna yezreɛ waḍḍan-a deg Ṭṭalyan anda ay mmuten 386 n yimdanen deg 24 n yisragen ineggura yernu d aya ay yessawḍen amḍan aɣrud n yimettinen deg tmurt-a ɣer 1.809. I usmekti, d Ṭṭalyan ay d tamurt ay yenḍerren akk seg ubayyur-a deg Tuṛuft.

Ɣef leḥsab n leḥsab ayalas ay yettwaznen i yimidyaten, amḍan aɣrud n wid yuḍnen aḍḍan-a yewweḍ ɣer 24.747 deg Ṭṭalyan, deg wakud aydeg yiwen n wass uqbel, 21.157 n yimuḍinen ay tella tesɛa Ṭṭalyan.

Tamnaḍt n Milano, deg Lombardia (deg ugafa n tmurt), d nettat ay d tamnaḍt ay yenḍerren aṭas akk s 1.218 n yimettinen d 13.272 n tejṛa.

Naqal d tamnaḍt-a ay yettwaɛezlen, azal n yimalas aya. Sakkin, yettwassewseɛ uɛzal akken ad d-iḥaz akk tamurt, yernu yewɛed uneɣlaf amenzu aṭalyani, Giuseppe Conte, akken aya ad d-yeglu s yigmaḍ ikmamen seg-a ɣef sin n yimalasen.

Iduba ilombardiyen nnan-d dakken uggaden lemmer ur seɛɛun ara yisegnafen-nsen akettur akken ad qablen tagnit ula ma Ṭṭalyan d yiwet seg tmura yesɛan isegnafen yelhan akk deg Tuṛuft.

« Mazal irennu umḍan. Ur ttɛeḍḍilen ara ad aɣ-faken wusuten » n udawi, ɣef wakken ay d-iɛetten, ass n usamas, Attilio Fontana, anebbaḍ n Lombardia, deg yiwet n tdiwennit d terga n Sky TG24.

Ma d amalal-nnes, Giulio Gallera, ay d-yelhan s tdawsa, yenna-d dakken « mazal nesɛa gar 15 d 20 n wusuten deg udawi aneẓẓaw yernu aql-aɣ netteddu ɣer tenqiḍt aydeg ulac tuqqla ɣer deffir ».

Deg Lezzayer, iduba xebbren-d dakken 4 n yimdanen ay yemmuten, ttwawekkden-d 54 n yimuḍinen. Aneɣlaf amenzu, Abdelaziz Djerad, ixebber-d dakken gan-d ametwi yerzan ladɣa asunen inafriyen n Leblida d Bufarikn akken ad yettwaɛzel unfafad-a ay teḥseb, imir-a, Tuddsa Tanmaḍalt n Tdawsa, d takaɣreft.

Lezzayer tuǧew-d, deg yiwen n yimalas, imelyunen n yidulaṛen n warrum akken ad tqabel anfafad bu uqacuc, ɣef wakken ay d-iwekked, ass n usamas deg Lezzayer Tamaneɣt, Mass Djerad.

« Tessewhem-aɣ tkaɣreft-a akken ay tessewhem akk amaḍal, yernu nɛerreḍ ad tt-nqabel s teẓdarin d teɣbula talsanin ay nesɛa, d warrum ay yellan ɣer-neɣ. Deg yiwen n yimalas, nuǧew-d mennaw n yimelyunen n yidulaṛen n warrum, tikamriwin tiẓɣalanin, tigrummiwin d yilemḍaden i uḥezzeb i lexṣaṣ yellan naqal », ɣef wakken ay d-yenna deg Terga Tis Kraḍt n Ṛṛadyu Taɣelnawt.