LEZZAYER TAMANEƔT – Yeɣtes unabaḍ azzayri, ass n usinas, akken ad yessigel, seg leɛḍil, akk isiklen s ubrid n yigenni neɣ n yilel gar Lezzayer d mennaw n temnaḍin n umaḍal aydeg tezreɛ tkaɣreft n unfafad bu uqacuc yernu yella-d waya d aḥezzeb s ubrid n « uɣḍas aseknakalan » i lmend n usejhed n wakaten n uḥezzeb mgal uzraɛ n waḍḍan-a.

I lmend n waya, yernu s usnas n lewṣayat n aselway n tegduda, Mass Abdelmadjid Tebboune, aneɣlaf amenzu, Mass Abdelaziz Djerad, iweṣṣa i lmend n usigel n umesni n yimsiklen ɣer neɣ seg semmuset n tmura taɛṛabin seg wass n usinas d asawen, ɣef wakken ay d-yenna yiwen n ulɣu n yimeẓla n uneɣlaf amenzu.

Wi d affugen gar Lezzayer d Tunes Tamaneɣt (Tunes), Lqahira (Maṣer), Dubay (Limaṛat Taɛṛabin Yeddukklen) d Ɛemman (Luṛdun), ɣef wakken ay d-yenna ulɣu-a.

« Ametwi-a yella-d i usejhed n wakaten n uḥezzeb mgal uzraɛ n unfafad bu uqacuc deg ugelluy aɣelnaw », ɣef wakken ay d-yenna ulɣu-a ay d-yernan dakken asigel-a d « asurfan » yernu smetren-t-id yiduba idawsanen iɣelnawen, am wakken ara d-yili usuɣal n yiɣermanen izzayriyen yessakalen, ussan-a, deg tmura ay terza temsalt ɣef leḥsab n tewtilin ara d-sebḍent tkebbaniyin n umesni agennan.

Daɣ, ɣef ssebba-a, iweṣṣa Mass Djerad aɣlif n yimahilen inagduden d umesni akken ad yessigel, seg leɛḍil, amesni n yimsiklen s yigenni d yilel gar Lezzayer d Tuṛuft seg ukwas, 19 Meɣres, d asawen.

Aneɣlaf amenzu iweṣṣa akken ad yettwassigel akk umesni agennan seg neɣ ɣer sḍiset n tɣerwaḍin tifriqiyin n temnaḍt n Ssaḥel seg wass n ukwas d asawen, yernu ti d Nwakcuṭ (Muriṭanya), Bamako (Mali), Niamey (Nijir), Dakaṛ (Sinigal), Abidjan (Côte d’Ivoire) d Ouagadougou (Burkina Faso).

la source:aps